Search This Blog

Monday, May 23, 2011

ليه بطلت اصدق المجلس العسكري

انا اول مرة اكتب مدونة بالعربي والسبب الوحيد اني قررت اكتب انهاردة بالعربي هو اني حقيقي نفسي كلامي يوصل اكبر عدد من اخواني واخواتى في مصر. انا انهاردة بكتب علشان احكيلكوا حقيقة المجلس العسكري اللي بيحكمنا الان.

في البداية لازم اعترف اني واحدة من الملايين اللي اتخدعوا في المجلس وفضلت فترة طويلة مصدقة فيلم الجيش والشعب ايد واحدة! ليه؟

 علشان انا اتربيت في بيت بيحترم ويقدر القوات المسلحة اشد احترام. ابويا لوإ جيش سابق وكان دايماً يحلكنا عن امجاد الجيش وقت الحرب. فبالتالي ماكنش عندى ادني شك 
                ان الجيش هدفه الاساسي هو خدمة وحماية الشعب..

بس وشوية شوية ابتديت افوق من االغيبوبة دي. البداية كانت يوم ٢٦ فبراير لما الجيش هجم علي االثوار بالضرب وصعق الكهربإ ووالشتايم.

انا كنت مصدومة الليلة دي، لكن لما المجلس نفي ان له اي علاقة بالي حصل انا ارتحت اقنعت نفسي ان اللي عمل كده اعوان نظام مبارك متنكرين في زي جيش علشان يوقعوا بين الشعب والجيش.

وباعدين اتكررت نفس المأساه يوم الأربعإ ٩ مارس. بس المرة دي الأهانة للثوار كانت اسوإ. كثير مننا شاف الفديو بتاع الفنان رامي عصام وهو بيحكي ويوريا عنف وبلطجة رجال جيشنا العظيم.

بعد كدة بأه العنف والأهانة بأقة حاجة عادية، اشي كشف عذرية للبنات علي حبة شتايم حلوين كدة، للمحكمات العسكرية واخرها كان الضرب بالرصاص زي ما كلنا شفنا وسمعنا يوم تظاهرات السفارة الأسرائلية.

كل ده كوم بأه واللي بيحصل علي الساحة السياسية كوم ثاني! الأول يطلعوا قادة المجلس الموقر علي كل القنوات يوعدواالشعب بمحاكمات عادلة لكل رموز الفساد وبعد كده كل 
 يوم نسمع عن واحد جديد من المسجونين بيفرجوا عنه!

وكفاية ان لسة في ناس كثير من حكومة مبارك الفاسدة في الحكومة الحالية. وخد عندك  
المحافظين اللي المجلس عينهم في جميع انحإ مصر، حاجة تفرح وتطمن بجد!
وايه كمان؟ اه نسيت افكركوا بأخونا السلفيين اللي ظهروا كدة فجأة وبعدها مصايب الفتنة
 الطائفية ابتدت تهل علينا واحدة وري الثانية! اشي مرة يقطعوا ودن واحد ماسيحي ومرة يهجموا علي كنيسة يدوروا عي السنيورة كامليا وبعدها يحرقوا كنيسة علشان مدام عبير. كل ده والجيش والشرطة ساكتين. يعني العنف والمحاكمات يا عزيزي المجلس له ناس وناس لأ؟

اكيد في بلاوي ثانية ممكن اقعد احكي فها للصبح. بس اعتقد اي حد شارك في الثورة وبيحب وبيخاف علي مصر بجد عارف انا بتكلم لي ايه

.بجد انا حزينة يا مجلس لأنك واحدة واحدة بتسرق مننا الكرامة والأعتزاز بالنفس اللي 
الثورة رجعتهولنا بعد سنين من الأرهاب و الذل والقمع.


ونفسي اسأل المجلس وكل اللي بيدافع عنه اللي بيحصل ده في مصلحة مين؟ مين المستفيد من الفوضي والأنفلات الأمني؟ مين المستفيد من عدم الجدية في محاكمة مبارك واعوانه؟ ومين المستفيد من اهانة وذل الشباب اللي رجعلنا كرامتنا وخلانا نحس لأول مرة ان البني أدم المصري دمه مش رخيص؟

انا للأسف معنديش ثقة في المجلس خلاص. مقدرش اصدق وعودهم ثاني وشلت من مخي تاماً اكذوبة الشعب والجيش ايد واحدة. الشعب طريقه كان واصح من يوم ثورة ٢٥ يناير واختار اسقاط النظام الفاسد. لكن الجيش بأه طريقه غامض ومخيف وبجد خايفة لو مشيت في طريق المجلس الاقي نفسي محكومة بمبارك جديد ولا مش بعيد يبقي مبارك نفسه!

3 comments:

  1. أنا كنت أنتوي الكتابة لكن صحيت من النوم قرأت حوالي 20 تدوينة لدرجة اني مش لاقي جديد ..... متنسيش الغموض حول مشاركة المصريين بالخارج المتعمد
    .... ان شاء الله نحسم المواضيع دي يوم 27

    ReplyDelete
  2. يا رب يا محمد انشاء الله

    ReplyDelete
  3. أنا أشاركك ..وأتفق معك في هذه الشكوك..وبكل الحزن أتمني أن نكون علي خطأ..ويكون المجلس العسكري من الحكمة..والحنكة قدير علي اثبات حسن النوايا...ويقتل بالعمل..والاصلاحات هذا _الوسواس _الذي بدأيتسرب الي القلوب..والعقول...ومن أجل استعادة الثقة علي المجلس العسكري الذي يتولي شئوننا أن يراعي..ويستمع للرأي الآخر...ويحقق وعده لنا__حماية أهداف ثورتنا المشروعة_

    ReplyDelete